Forseti ASÍ hvetur til samstöðu meðal launafólks
Gylfi Arnbjörnsson forseti ASÍ kom víða við í ræðu sinni á 4. Þingi SGS sem haldið er á Akureyri dagana 16.-18. október. Honum var þó tíðrætt um undirbúning kjarasamningana og það megin stef sem aðildarsambönd ASÍ virtust vera sammála um. Verkalýðshreyfingin vill stutta kjarasamninga, stöðugt verðlag og aukinn kaupmátt. Þá virðast allir vilja leiðrétta ákveðna hópa umfram aðra.Gylfi harmaði skort á samráði við núverandi stjórnvöld sem hafi haft fögur orð um samráð og samvinnu við aðila vinnumarkaðarins. Því miður hafi lítið farið fyrir því enn svo lengi. Í nýframlögðu fjárlagafrumvari væri að finna rangar áherslur og forgangsröðun. Þetta er nokkuð sem verkalýðshreyfingn mun ekki sætta sig við og nú verði að varnarbarátta um velferðarkerfið að hefjast.
Að lokum kom Gylfi inn á þau málefni og þætti sem aðildarfélög ASÍ teldu nauðsynlegt að ræða við stjórnvöld og atvinnurekendur í komandi kjarasamningum, ef ekki eigi að koma til harðvítugra átaka á næstu mánuðum. Breið sátt og samstaða á meðal launafólks væri hinsvegar forsenda þess að hægt að ná fram leiðréttingum á lífskjörum. Verkalýðshreyfingin þarf að nota veturinn til að undirbyggja sáttina sem geti lagt grunn að raunverulegum stöðugleika og uppbyggingu sem byggi á traustu velferðarkerfi og jöfnuði í þessu landi